बझाङ, वैशाख २१: शनिबार भीरबाट लडेर बझाङमा एक महिलाको मृत्यु भएको छ ।
जिल्लास्थित जयपृथ्वी नगरपालिका वडा नम्बर १ भण्डारकी ३५ वर्षीया हरिनादेवी बोहराको भीरबाट लडेर ज्यान गएको हो । शनिबार दिउँसो ३ बजेतिर घर नजिकैको डाँडामा घाँस काट्न गएकी बोहराको भीरबाट लडेर मृत्यु भएको प्रहरीले बताए ।
उनीसँगै घाँस काट्न गएका अन्य साथीहरुले गाउँमा खबर गरेपछि मात्र थाहा भएको परिवार स्रोतले जनाएको छ । मृतक बोहराका ४ छोरा र १ छोरी रहेका छन् भने श्रीमान ज्याला मजदुरी गरी जीवीकोपार्जन गर्ने बुझिएको छ ।
