महोत्तरी साउन, २६ : नगरपालिकाले कर बढाएकाे विराेधमा अाज महोत्तरीको गौशाला बजार बन्द गराइएको छ । बजार गौशाला उद्योग वाणिज्य संघको अगुवाइमा बन्द गराइएकाे हाे ।
नगरका सर्वदलीय पक्षको समन्वय र आग्रहमै संघले बजार बन्द गराएकाे हाे । नगरपालिकाले अत्याधिक मात्रामा कर लादेको भन्दै विरोधस्वरुप बजार ठप्प पारिएकाे उद्योग वाणिज्य संघ गौशालाका सचिव सुनिलचन्द्र झाले बताए ।
सचिव झाका अनुसार गौशाला नगरपालिकाले आर्थिक वर्ष २०७५/०७६ को बजेटमार्फत अत्याधिक मात्रामा कर बढाएकाे छ । अधिक करले गर्दा जनताकाे दैनिकी नै प्रभावित भएकाे भन्दै विरोधस्वरुप बजार बन्द गरिएको उनकाे भनाइ छ । नगर समितिले बजेटकाे सिलिङ गर्दादेखि नै विराेध गरिएकाे तर वास्ता नगरेपछि बजार नै बन्द गराउनु परेकाे संघका पदाधिकारी बताउँछन् ।
