कृष्ण प्रसाद सापकोटा
देश अहिले पुनः एक ऐतिहासिक मोडमा उभिएको छ। जारी संसदीय निर्वाचनले जनतामा नयाँ आशा र अपेक्षाको वातावरण सिर्जना गरेको छ। दशकौँदेखि राजनीतिक अस्थिरता, असफल सत्ता समीकरण र अविश्वसनीय नेतृत्वका कारण देशले निरन्तर अस्थिरताको चपेटा भोग्दै आएको छ। यिनै कारणले सुशासन र आर्थिक समृद्धिको सपना बारम्बार अधुरो रहँदै आएको छ।
यस पटकको निर्वाचनले जनतामा परिवर्तनको गहिरो आकांक्षा जगाएको छ। नागरिकहरू स्थिर र जिम्मेवार सरकारको खोजीमा छन्—त्यस्तो सरकार जसले केवल सत्ताको सन्तुलन होइन, राष्ट्रको दिगो भविष्यको दिशा देखाउन सकोस्। स्थिरता बिना सुशासन सम्भव छैन, र सुशासन बिना आर्थिक समृद्धि केवल कल्पना मात्र हो।
विगतका अनुभवले स्पष्ट देखाएको छ कि अस्थिर राजनीतिक वातावरणले नीति निरन्तरता, लगानीको विश्वास र विकासको गति सबैलाई कमजोर बनाउँछ। विकासका ठूला योजना बीचमै रोकिन्छन्, विदेशी लगानीकर्तामा अविश्वास बढ्छ, र सामान्य नागरिकको जीवनस्तर सुधारको अपेक्षा अधुरै रहन्छ।
अब देशलाई आवश्यकता छ उत्तरदायी नेतृत्व, पारदर्शी शासन प्रणाली र नीतिगत स्पष्टतासहितको स्थायित्वको। जनताले मतदाताको अधिकार प्रयोग गर्दा दल वा व्यक्तिमा होइन, दृष्टिकोण र क्षमता हेरेर मतदान गर्नुपर्छ। राजनीतिक दलहरूले पनि अब वाचा मात्र होइन, विश्वास दिलाउने व्यवहार देखाउनुपर्छ।
लोकतन्त्रको अर्थ केवल चुनावमा सीमित छैन; यसको सार उत्तरदायित्व, जवाफदेहिता र सुशासनमा निहित छ। यस निर्वाचनले त्यो आधार तयार पारोस्, जसले देशलाई दीगो आर्थिक विकास, अवसर र समृद्धिको यात्रातर्फ अघि बढाओस यहि देशभरका नागरिकहरूको साझा अपेक्षा हो।
